都BACKUP好了，所以我搬了！希望會搵得番D訂閱BLOG。SEE YA~!!
2011年9月30日 星期五
鬆動的BIG DAY
本來已準備好29/8同波羅去金都交印帖表格，因為婚期其實都距離只有兩個多月而已，仲唔印帖真係驚嚟唔切。真的是拖無可拖了。
不過「屎忽痕」的我因為心有不甘想問一問聖堂可否推遲行禮時間，因為我記得交訂時有一對新人沒來，懶天真的我就想知究竟他們最後有沒有交到訂，如果沒有我當然希望推遲一小時行禮，因為我們那天早上行禮要從天水圍過元朗再仆出跑馬地，我想整個上午我們可能會累個賊死。然後中間空出幾個小時又不知做甚麼好？又要可能安排親戚不知去那兒－－
之前成日都叫波羅去問，但他次次的反應是：人地明明都話無位囉，問嚟做乜？一係佢就無睬我。如是者是一路無問過。上星期五我本住令自己死心的情況下打去聖堂問，但負責婚禮的姐姐不在，要到星期一才有得問。（我唔明點解身為教徒的佢唔去問要靠我呢個非教徒去問）
星期一(29/8)都至少打咗三次電話，下午才找到那位聖堂姐姐。
聖堂的姐姐好聲氣告訴我「係呀，雖然佢地交訂嗰日無嚟，但最後都交咗訂啦！」
諗住死心之際，誰不知聖堂姐姐告之當日下午時間有新人取消咗個BOOKING！問我地會唔會想調去嗰個時間？
下？又會咁好彩？呢個時間真係好perfect呀，朝早的接新娘唔駛咁趕，下午行完禮可以跟住就過酒樓，完全唔駛呆幾個小時呀～！
呢個果然係機會，真係唔會有人好似我地咁懶咁遲都唔印帖，就算有場都可能好多嘢HOLD住哂～！跟住拿拿聲問波羅意下如何？佢當然即刻拍板叫好，但另一樣更重要的事，就係要確定幫我們主持婚禮的神父有沒有空？
原來神父真的很忙，千找萬找，星期一都真的找不到，唯有拖多一日才去印帖。幸運地在星期二終於找到了他～！神父亦都應承了！不過係會辛苦他了，因為本身他就要在我們行禮之前主持一場婚配聖事，連續做兩場，希望他不會累壞啦～！
如是者，帖都在同日搞定了～！
突然覺得，這都是神的恩典啊～！
2011年9月18日 星期日
奶奶
人心有時真難測，你對人好地地，但原來人地唔係咁諗，個誤會仲越踩越深......
我成日都以為自己好彩，遇到個好奶奶，遇到個明白事理的長輩，點知原來都係我一廂情願。
我成日都同波羅講，我要唔要（對佢阿媽）做呢樣呀做嗰樣呀，佢成日話唔駛，都一家人囉點會計。有時又話我唔好咁諗佢阿媽，佢阿媽對我地好好咖，好為我地著想呀咁......
但事實又的確唔係咁，原來未來奶奶有好多嘢谷埋谷埋咗，無人知！上個星期終於爆咗出嚟！
但其實，好多嘢都唔關我事，好多事都係波羅自己搞出嚟，但偏偏未來奶奶以為係我叫波羅搞出嚟！波羅同佢解釋咗兩日，佢都唔信！
佢越睇我越唔過眼......我而家係好心淡，都唔知點解原來我都係遇到個衰奶奶！
今日我同波羅攬住喊，喊咗成日。
我諗呢條路開始唔易行。
唉，唯有見步行步啦。
2011年9月16日 星期五
過大禮
終於搞定了過大禮～！！
除了揀日俾了800大元外，之後我都唔打算再俾錢人問，因為我唔明嗰位揀日師傅要安床過大禮的時間要另外俾錢才問到!!!而且為了遷就聖堂行禮時間所以其實很多事也無得跟。
所以決定：靠自己！
於是在網上左翻右翻，見到其中兩位blog友同我同一日結婚的，一個揀了9月16日過大禮，一個揀了9月17日過大禮，於是我就翻了翻d月曆睇下究竟邊日好日。
月曆Ａ：16日好日，17日唔好
月曆Ｂ：16日唔好，17日好日
月曆Ｃ：兩日都唔好(過完大禮才見到的)
純屬個人喜好，我揀了16號，可能先入為主覺得好日啦~!!
至於過大禮用品，我地就揀響元朗Ｘ益廣場（忘記名字，總之有吉之島十蚊店嗰間）一間賣婚慶用品的鋪訂，價錢算係幾公道。
不過攞嗰日就知多嘢，男家都兩籃，女家就植物幾棵，仲有一盤餅。我就辛苦囉，要托住Ｄ植物同盤餅返入女家，然後等過大禮嗰日交換呢！唔少得的仲有我的嫁妝箱同米奇龍鳳被喇！
由於波羅無車，咁多嘢只好叫車出來，再跟住叫車走！就係咁，我就順便俾埋Ｄ行李佢地搬埋！波羅就搵咗佢的好朋友米生先幫手，米先生真係辛苦你喇！
2011年9月8日 星期四
極速「遞交擬結婚通知書」
以下內容對於想在婚姻登記處註冊或律師證婚無乜幫助，千祈不要給我誤導～！
由於我與波羅會在聖堂結婚，所以要去婚姻登記處取一張紙。張紙拎到之後要在三個月內舉行婚禮，所以我都係計劃過了三個月前期限才去拎。
之前我一路都叫波羅處理的，因為他份工的時間較彈性，但到了婚期前三月他都無任何行動。起初我我以為只是直接上去登記就行，怎料看過了入境處的網頁，原來交的表格「遞交擬結婚通知書」是要預約的，況且我記得要去宣誓，但就不知要搞多久，我不想請假呀。
由於我工作的地方距離金鐘的婚姻登記處實在太近，只有五分鐘路程（已包由我離開寫字樓到上埋三樓的登記處）。有一日趁住工作有點閒，無人注意下開溜了過去婚姻登記處查詢。
婚姻登記處的詢問處在20號窗，不過呢個窗好抵死，係響成個婚姻登記處的最入面！這個窗的功能其實係好犀利，基本上所有的分流都在這兒。不時這個窗是沒有人的，只要有人行過去就會有職員「飄」過來。
當日見我的是一個穿便服的女職員。其實我主要是問要不要兩個人一起來。女職員解釋說，如果交表當日是兩個人一起來，那當文件弄好後，就可以其中一人取文件，否則取文件當日要兩個人一起來。權衡利害，我覺得當然是第一次做宣誓時一起去較好，將來取文件我只要自己時間過去便可（近嘛）。
職員給了我一份遞交擬結婚通知書所需資料的表格同時提醒我打電話預約時間交表，我問網上預約OK嗎？她說都是可以的。
回去以後，我便上網研究網上預約。
網上預約其實都很簡單，首先要輸入以甚麼方法結婚（註冊處、宗教場所、婚禮監禮人）、結婚日期、男女雙方名及身份證號碼，之後就會有时間選擇。
我怎也想不到原來登記處竟然午飯時間都有開放，真的連假也不用請了，於是選了最快日子的1330。
然後我又留意到有以下一段：
當你成功辦理預約後，你可進一步使用網上服務，預先填報婚姻登記所需之詳細資料，這將有助節省你在登記處遞交通知書時辦理手續所需時間。
如你選擇網上填報婚姻登記所需詳細資料，請你最少在預約日期前1天經網上遞交。
於是便研究一下，原來那份婚姻登記所需資料其實是與手填表格一樣，於是我便快快手手填好網上遞出。
到了當日，我趕快把工作做完，趁著人流較少的時間便過了婚姻註冊處。這時候波羅已經到了。我們便立刻到20號窗報到！這時候招呼我們的是一位穿著白裇衫的入境處男職員。他說：你們早到了！看看我們能否有時間給你們早點見。
除了我本身手頭上帶了PRINT出來的表格外，這位職員也給了我們一張紙，是用來寫我們的行禮地點。
都沒有等了兩分鐘，就叫到我們了。
那是另一位穿便服的入境處女職員（相信是ACO吧?），在快速地對過我們的資料及收了錢後，由我們核對清楚填報資料後，便由波羅負責讀宣誓誓詞。不過讀誓詞時是要在入境處職員面前讀的。
讀誓詞會有一塊木板提供，分別以中文、英文及簡體寫成。在中文那頁，最後一一個字「訛」旁邊有張貼紙，寫著「音：娥」。可能有很多人不懂讀吧，不過如果聽過成語「以訛傳訛」就肯定會讀了，不難啊！
最後，又到那位女職員給我們一張收據，表明在17日後那張婚姻登記官證明書就可以取啦，於是我們在半小時內就搞定了整個遞交表格程序啦！
訂閱：
文章 (Atom)