今日去埋溫馨作final試衫，我已經可以同呢間嘢打分：50分
上一次試衫試得唔開心，於是有一日我同我個妹貢上去又再同經理傾傾。佢當日同我提早咗個final試衫日同埋話搵peggy幫我試衫，唔再搵上次位女仔。
唔知點解今日無咗peggy響度，我對呢個安排有點失望，點知最終又係上次個女仔。
我只可以講，佢真係唔熟間公司有咩衫，拎極的衫都唔啱心水。
其實間公司已經無相俾客睇，所以拎衫俾客人真係十分重要。我今日最後決定嗰件婚紗，總算符合我當初的條件，但佢係到最後一刻至拎出嚟，令我懷疑係咪真係佢地成日留起Ｄ衫，等到一Ｄ客真係頂唔順至拎出嚟。
去到後期佢ｄ說話重有點礙耳。搞到波羅都忍唔住出咗聲。我覺得佢信自己多過聽個客的意見。
我見過bessy，開單的係mandy，但試衫呢位女仔，完全唔得。
而個經理寫咗話安排另一個人俾我都無安排過，真係要扣分。
上次去買婚戒當日，其實之前有順便睇裙褂，因為都見日子近，再拖落去都無意思。
於是當日與波羅同佢父母一行四人浩浩蕩蕩去了油麻地永隆。
一去到原來無人喎，好開心呀，於是諗住一陣間要講價喇。
點不知企入去都無五分鐘，就有一對男女入嚟睇褂。佢地都好老實不客氣，人地客人企響COUNTER，佢就越過人地又話要睇褂。
阿店主姐姐十分醒目，拎住D相簿就領番佢地行出少少去睇。
其實我係有少少唔開心，因為有人響度就令到個講價大計禍咗！！
因為嗰日係星期日，成間店得店主姐姐一個睇鋪，而個男店主係唔會招呼客人的，所以位店主姐姐疲於奔命。當然佢疲的原因，係招呼緊我地之餘，又有D人急唔切又話要試衫囉。後期都有第三PAIR人嚟，不過佢地就靜靜咁響度等，好尊重人，無嗰PAIR人咁唔尊重嚟咗的人。
試咗幾件我都覺得麻麻，後尾見到「吳尊重男女」試一套褂，我問店主姐姐呢件我求先有無試過呀，原來無喎，個位女士猛話件衫窄，但我又覺得啱我河車喎，於是就試下啦，試咗都fit身，於是立即扑鎚要了。反正好似試嚟試去著上身都係咁，又唔記得帶相機喎～！（d相只能用電話影了。)頭尾到店到決定都唔駛15分鐘。
咁我就試下講價啦，但梗係唔成功啦，店主姐姐話送睡衣俾我。其實諗深一層，係人租褂都會送睡衣啦，其實都無乜特別。不過唔好煩，算啦，拿拿聲俾錢走人。
臨走時吳尊重男女問番嗰件衫，店主姐姐即刻話「封咗褂囉」。唔知有無激到佢地生蝦咁跳？不過後來未來奶奶同未來老爺口徑一致話唔會封褂喎，因為以前有位親戚係做呢ｄ中式繡莊，佢地話唔會唔再租出去。仲話如果嗰位親戚在生就一定會有大把褂俾我揀，不過我揀係無份啦～！！
其實我而家已經忘記套褂，唔知套褂到時又啱唔啱我著呢？？
呢排我又係少寫BLOG，因為隻手臂/背脊又痛，搞到我無心機寫。
真係好少可會CONFINE自己在一個地方，好似而家咁，因為約咗人但又未夠鐘而又唔知去邊好所以留咗響寫字樓做「自己嘢」!
呢排都做咗ｄ嘢，雖然唔多，不過記得就逐樣講下。
新鮮滾熱辣的係去JOSEPH PHOTO睇排版。
其實上次翻影係4月22日，跟住睇相要到5月28日，之但係個排版等到七月頭都仲未有得睇。於是我打電話去問，又原來有得睇喎，咁就約咗前兩日上去。
我地覺得其實真係唔使等咁耐，因為上次其實做好了一個排版，因為翻影只換了十張相。不過我地都算了，有得睇盡快就ＯＫ，因為我又要相做簽名報，又響團購買咗Ｄ板相都就快夠期。
我覺得因為想盡快搞定Ｄ嘢，所以已經諗定如果差唔多都拍版。
不過－－
唔知點解今次都係有少少失望，其實我唔知排版係咪外判，但我覺得其實今一次個排版嗰位人士唔知做乜鬼，排得好鬼古怪。我眼見D相其實就真係無咩點排，都係一張相一版咁樣，都算啦，但佢會將D好唔拉根的相篏埋一齊，例如一張石澳背景橫跨兩頁的大相，會離奇地整咗個響花園影的相入去。其實都有其他石澳相可以整入去，我唔明點解佢會搞成咁囉。當然仲有好多相左右兩邊唔夾，於是我就話不如我自己ARRANGE過D排位啦!!但係最弊原來唔可以兩本相簿同時開嚟檢閱，於是剩係檢視相的次序都寫到我暈~!!
搞下搞下，好在阿VAN嚟咗幫手，佢幫我RE-ARRANGE D位，不過後尾佢都話等佢同個排版師傅傾傾先，因為佢到睇到暈暈地~!!其實我明位排版想慳功夫，但始終插入去的相真係左右唔MATCH，甚至成個畫面唔得。老實講嗰D都唔叫咩排版，都係一張張相於入去之嘛。有時唔好交行貨交成咁呀，我地睇到頂唔順，佢地咪又要再做，咪又再一次浪費時間~!!
我都有諗過自己再做（可能得個諗字），不過我諗到時收到相唔係RAW檔可能無做得咁好。究竟應唔應該呢一刻好嚴格要求呢批相簿要整得好好呢??
下星期又再睇排版，希望做番好少少啦，過得人過得我，我唔想再煩呀～！！
