Pre-wedding 睇相 (Joseph Video & Photo補拍) (無相)

　　尋日原本要返工，但因為之前Joseph補拍後book了尋日睇相，我又唔想再調來調去，所以唯有同同事對調星期六duty。

　　今次我地都好準時早上11時過少少到。上到去原來客人都係我地最早到。

　　本來上次約星期六話全部相重頭睇，但去到就初步俾新影的相我地睇，即係揀今次的相去replace某一些上次揀了的舊相。我諗下都算啦，如果由頭開始睇我諗我都係得個亂字，而且其實今次只有影一個地點，我都無理由唔要之前的相，起碼d景都係特別唔同。

　　今次招呼我地的係阿van。可能由於之前表達過揀相唔可以自己揀比較覺得揀相唔夠自在，所以今次俾我地自己click星星揀相。我覺得咁樣幾好。不過一個個人唔同的，有些人可能用唔掂電腦要職員幫，我地就比較prefer自己揀。但當然另一個原因睇住你揀相係唔想你私底下用相機影底d相。不過我同波羅都無諗過要私底下影呀，因為之後有咁多張相俾返我地，仲影嚟做乜？

　　今次的相我都幾滿意，影了百來張相。其實我都唔知揀幾多張相度，我諗揀十來張會係差唔多。呢一揀我都揀咗一個鐘。今次的相比較多「唔駛點執都幾靚」的相，就係有d難揀的係波羅唔知望邊或者笑得怪囉。

　　招呼我地的阿Van講講下話其實可以加錢造多本相簿。唔知點女人的天性會係心郁郁想造多本。不過，都係睇下之前的相retouch成點先。原來retouch過之後都有好多唔錯，不過額頭真係整到好高囉。尤其係書簽嗰張........不過嗰個背景係影直身，執咗之後又好似好些，比較配合書簽長身的設計，所我心諗都係接受個高額頭啦。另外本來想換油畫嗰張，但新揀的相同原先揀的相比較之下無咁多顏色，而本身揀的地點就係我一直比較鍾意的月明泉，所以一輪struggle之下，書簽同油畫保持不變。

　　但至於要out走相簿內原已揀好的相，呢一part似乎唔係咁難，因為我地都係用咗一陣間就揀咗唔要的出嚟，有d真係上次好困難咁揀咗出嚟。由於係咁，又變咗無需要加錢造相簿了。但我有信心，今次覺得d相真係會幾靚囉。

　　問心我覺得個後期製作算幾好，d相執完之後都真係勁咗好多，我想講的當然係石澳嗰part，都真係感覺到個background幾澎湃、幾宏偉。不過我地將其中一本雜誌式相簿18頁轉咗做10頁硬皮，感覺上其實幾迫，排版都有點難度。不過我始終覺得整硬皮係好d，俾人睇無咁易整皺嘛。