我的租車記!!

　　有一日，見到BLOG友shanshan的BLOG K.O. 花車 ，心想都係時候要訂車了。在問了波羅以後，於是便懶懶的SEND EMAIL俾孖一世的FRANKIE，問他還有沒有車。

　　估唔到咁鬼遲都仲有車，就係得番架金色！

　　(其實我打俾FRANKIE時都無格過其他租車咖，個個BLOGGER話好的，慳返D格價時間嘛！)即係一般B2B都傾向鍾意架紫色車，或者其次的粉紅色，但好在我無呢方面的偏好，反而我覺得抵同好評至係最緊要的，而且架車都靚丫，於是都開開心心諗住BOOK車嘞！當然後尾我發現原來MC WIN都一樣租金色喎！

　　誰知當我將呢個消息向波羅匯報時，佢突然話要BOOK主車！其實都係我隨口問佢佢至講咋，無理由咖，佢明明話同朋友借車......原來佢嗰位朋友換咗架車係得兩個位的！咁我唯有又去問FRANKIE有無主車借啦，今云就一如所料係無啦！好激氣呀！原來波羅個friend係兩個幾月前已經換車......查實舊年我已經問佢訂車的事，到早排過完年我又有問佢，都唔知點解佢唔講囉......否則都可能BOOK到啩！

　　於是成件事唯有推倒重來。我再去搵一些有主車連VAN租的公司，其中一間我有搵到的係軒武的BILLY。價格其實比孖一世貴少少，評價都唔錯。不過，最弊的係我嗰日都係得VAN而無主車......跟住都睇了不少花車公司，價錢真係貴好多咖！

　　我有問過波羅不如用佢老豆架車做主車啦，都係金色之嘛，都襯架VAN，但佢話無見人用TOYOTA結婚喎.......咁不如借七人車啦，夠闊落喎，佢又話，七人車大把人可以借，但你唔好後悔喎.......

　　咁唯有睇其他租車公司，我有睇過大昌行同AVIS，不過原來D靚仔D的車款，都係好貴呀，仲要係租好短時間咋。就響呢個時候，我見到瑞吉兒推介LONDON TAXI。其實我都係無諗過一定要呢D車咖，不過與其租架主車都係咁上下價錢，不如租架LONDON TAXI心理上好似抵D喎！

　　於是我又聯絡咗網上好評如潮的租LONDON TAXI的阿達。佢話俾我聽原來我結婚嗰日仲剩返粉紅色同金色。估唔到都仲有車呀！於是又拿拿聲約時間睇車喇！

　　不過呢個租車故事當然唔係咁簡單，又係有少少波折，原因係我睇到BLOG友JaCkiE的我要做一日BARBIE!!!話要租粉紅色LONDON TAXI。咦？阿達話我有兩架車揀嗰喎？雖然我個心係鍾意金色的，但我都覺得點都要睇下兩架車的狀況。其實阿達都好老實話我知，響我問完佢之後，竟然又有兩位B2B問車呢，仲要同一日啊！不過佢因為應承咗我，都係俾我睇車先啦！

　　於是星期五便去了睇車。

　　原來阿達個款係有D怕怕羞羞咁，但其實個人都幾健談。去到停車場，有四架車泊響度，就係金色、粉紅色、桃紅色同黑色。黑色阿達話唔租，但遲D呢架車就會變成其他色喇！而我梗係主打睇金色車同粉紅色車啦！其實起初我形容粉紅色車俾我男朋友，我係話隻粉紅係「傻豹」嗰隻粉紅色，我諗真係係人都諗到係咩色呀！

　　粉紅色車的內籠就靚D，特登整咗D靚梳化，金色車就普通D囉，基本上我見桃紅色車個內籠都係無咩嘢的。

　　經過一番斟酌，我地都係決定要金色，可以襯埋孖一世架VAN，加埋未來老爺架私家車，真係夠哂浮誇！　(希望當日可以三架車一齊影番張相啦！)另外一樣嘢我有驚喜的，就係阿達同架金色倫敦的士換了新車牌！

(舊車牌)

(新車牌)

　　係呀係呀，因為之前係7675喎，你地話幾咁唔好聽呢！而家轉咗牌，VERY GOOD呀！之前我仲同佢講無乜點POST金色車的相上佢個BLOG度，佢都即刻POST喇！非常快手！咁佢都話金色車其實少D人租，所以我覺得金色車其實真係幾新淨！

　　阿達又好搞笑，俾D相簿我地睇，起初我波羅以為佢SELL我地車的DECO，但原來阿達只係俾我地參考下人地點DECO咋！於是梗係好順攤咁奉上500大元落訂啦！

　　主車已定，拿拿聲搞番掂FRANKIE嗰邊喇！

　　話時話，阿達架LONDON TAXI真係可以同FRANKIE架金色VAN做PARTNER咖！佢地可以諗諗。。。。。。