負一週年紀念快樂!!

　　終於到了負一週年紀念日。

　　還有一年，就真正成為人家老婆了。

　　這種感覺，還真美妙！

Joseph Photo Pre-wedding後感（攝影篇與服裝篇）

　　寫完MUA，就輪到PHOTOP同服裝。因為其實兩者可以著墨的也不算太多，所以決定一齊寫。

　　PHOTOP係阿健，是我參考過其他JM的意見再加睇相去揀的，其實都不會差得去邊。佢個款都幾型仔的，雖然佢係有「男人的煩惱」，但佢個skin head look再襯左耳一隻鑽石耳環再著緊身衫褲，再加上我feel到佢個d藝術家性格，又真係幾型男。（不過我唔再讚落去因為讚其他男人好可能會俾波羅扭甩我個頭！）

　　我想呢部份我覺得大體上都滿意，因為在每個地方影完阿健都會俾我地睇下佢的作品。我見佢的相大部份都係遠鏡，近的比較少，但我諗因為係影raw的，到時若果要修改照片時應該無所謂。因為我絕對有擔心無相係適合做油畫......這個亦是我覺得我不多不少要負責任的地方，我應該一開始就同佢講我想每個地方都會影些大相係for油畫相用。呢張相除咗係擺酒好重要之外，也是應該放在家中的嘛。

　　另外就是我覺得影相時好似著了道兒，明明個心想同阿健講自己想點影點影，但在拍照期間就是怎的也開不了口......我想要解決這個問題，應該真的一早記低自己想影的動作，然後email定俾位photog睇。或者到時候認真點同攝影師坐低5-10分鐘講一次。但以上兩項我都無做到。

　　據波羅所講，阿健曾幾何時是某間婚紗店的攝影師。但傳統的婚紗店照片都會太過standardize，而且因為逐張計錢而令他們攝影師的一番心血浪費。故此我們心目中都認為阿健都是一位有要求的藝術家。

　　講完攝影就講服裝。

　　Joseph的婚紗與晚裝好像很少呢，特別是晚裝，我總覺得很難揀落手。所以我都是揀了三套婚紗一套晚裝。

　　但婚紗就認真唔合身，其中一件修改後個胸墊經常走出來，心口又有個位置經常翅起，搞到我影相時「周身唔聚財」，硬係擺唔到啲較自然的pose。

　　11月中便睇相了，希望到時候我都會揀到48張相造相簿啦。

Joseph Photo Pre-wedding後感（MUA篇）

　　襯著記憶猶新，我還是快點把Pre-wedding當日的情況記下吧，因為我真的很快失憶，又或者遲些會有遺忘了的記憶要更新。我見joseph其實沒有甚麼人comment，我就不如寫寫自己的感覺啦，這一篇先寫mua。

　　之前有講過試衫時遇到JOSEPH的NICOLE好好人，所以令我很開心。但在拍PRE-WEDDING的當日我就覺得不太開心，主因是我覺得個造型唔得。基本上，可以話位MUA唔得。唔知係咪因為之前試咗BIG DAY MUA MAY仔的妝，我覺得呢位MUA的功力差太遠。

　　個位MUA一開始問我想要咩造型又俾本書我睇，佢又提到有些新娘不喜歡露額頭。這樣她一說之下，我即表示我都是不想露額頭，因我本身個額比較闊。但唔知點解頭兩個妝都是露額。第一個妝無為意因為未適應亦無睇清楚PHOTOG所影的相，到了出街的相，我睇返相時覺得個額好大。我想講照鏡有時好難睇得出影相後的真實情況，因為實在睇慣咗鏡中的自己係睇唔出咩問題，但睇相係睇返個樣的反面－－亦即係一般人睇自己的樣的角度，我就覺得好唔靚囉！

　　我感覺佢化粧好慢，有可能因為化粧時我驚波羅悶，加上我有一份趕住fax俾學校的form要填，我叫波羅讀俾我聽，唔知係咪因為佢八八卦卦掛住聽我份form的內容所以失哂憶？其實化到中途我係諗住休息下唔再理份form就無叫波羅讀落去，但呢份mua又突然口多多話可以繼續，於是波羅就繼續讀出嚟。

　　其實我一開頭已經同佢講咗室內景要似公主，因為著蛋糕裙；第一個外景妝要高貴的（性感魚尾裙），第二個妝要似女神的（紗裙）。我唔知佢其實佢有無記住。

　　第一個室內景，我諗我一定未回神，因為而家想起個妝其實好多不滿意。1. 唔知點解幫我戴一朵大假花，我有買真花她不用。2. 幫我戴條珠項鏈但耳環係閃閃那種。我覺得應該戴珠耳環，一係就戴閃項鏈。而家兩個部份好Contradict。仲有，我又係未瞓醒，其實我自己帶了不少珠配件來，但不知為甚麼我省不起要用。

　　第二個造型係出外景，佢拎咗我兩大ｐａｔ繡球花想放想我個頭度，我呢次真係即刻出聲話要換。雖然繡球係我買，但我仲買了淺色玫瑰，繡球我覺得用來做配襯較好，成堆繡球上頭我覺得好唔靚。加上係我買，我覺得繡球係有些少謝，無理由做主打花，於是傾咗一輪佢至肯換，仲話我個頭細要平衡下。最終換了之後，「自我感覺良好」，但就忘記個額頭原來露了很多。

　　第三個造型其實已經係響影咗大半日之後才換，在我堅持下換了一個髮髻的造型。我有講過用kelly頭再低點的髻，但最後低咗好多。礙於時間關係（因為快日落了），我就算了繼續影。我都覺得有點過份成熟，但睇相photog影的相氣氛不錯，希望照片中我的樣子沒有想像般差。

　　最後一個晚裝造型，我都無甚麼comment，因為由頭到尾呢位mua都無給我鏡望個妝滿意否。我又無帶鏡來，所以其實對於自己甚麼妝容無甚概念。

　　另一件事我認為位mua工作態度麻麻，有些少散漫的心態，我件衫多番走位，很多時要到photog出聲她才替我整。我見她這樣有時都自己搞掂，例如撥頭髮、拉番些走位的胸墊(這個部份以後才講，也是令我失望的地方)，自己搞有時還快，雖然現場有另一位助手，但他是男的，有些地方要他搞就顯得不方便了。

　　我覺得婚攝個MUA不多不少都很影響pre-wedding的效果，現在唯有在11月中看看最後照片內的妝容會如何。

Pre-pre-wedding 試衫

　　下個星期就要拍攝婚照了，但鮎魚來勢洶洶，不知下星期天氣如何??我只希望我拍照那天好天啦，如果個天灰濛濛的相就不夠漂亮了。

　　不過無論如何，今個星期始終要上去試衫。否則人家沒時間改衫了。

　　一放工便與波羅趕去北角Joseph的studio。今天都不太多人，只有約兩對人客在等取相。職員拿了兩本相簿給我揀衫。其實可以揀的衫不算多，特別是晚裝，真是比較少。不過今日超級大頭蝦，只準備了GIRDLE但忘記了要預備NU BRA。不過幸好著住GIRDLE都可以照試。

　　試衫過程比我想像中快，協助我試衫的是Nicole與另一名女仔，一個替我脫，一個替我穿。廿多件衫一次過試完。我覺得兩位超級好人，有問必答，面口也很好呢。其實我到最後要決定衫時真的猶疑了很久很久，或者因為自己的心水與波羅及另外一名職員不同，但Nicole給我分別再試了一件晚裝及一條婚紗，她說讓我心息，當時其實已換回自己衫了。不過因為如此，我最後都決定好了衫啦！哈哈！這陣子經常都覺得不開心，但原來試衫可以讓人開心番，當然我覺得NICOLE與另一位四眼妹妹的服務很好很有關係啦！

　　希望影相個日好天啦！

 

今日做咗幾樣嘢！(見工、蔡太、染髮)

　　今日做咗好多嘢！

　　首先今日又去見工。

　　其實我呢份工剛剛轉又算係好地地，時間不錯人工尚可，之但係唔夠多囉，個名亦唔夠響。前途當然亦無得比。

　　見工前個心仍然係十五十六，唔知轉咗工會唔會好忙。

　　但當見完工後，我覺得我應該做唔到呢份工，我覺得我口才真唔多好，辯才又唔得。個考官由笑口吟吟IN到面色一沉......或者，我係應該留番響而家份新工度。

　　樂觀啲諗，而家份工對於一個將會有一個家庭而又準備有小朋友的人來說不錯，唔上進都會有一定收入包餓唔死，同以前份工亂咁嚟的返工時間比又算得上係天堂與地獄。

　　也許，我應該知足。

　　見完工，就去搵蔡太買GIRDLE。原來真係我幾年前做伴娘時去那間。真係......好死多人。

　　其實我知係要排隊，但估唔到要排咁耐，搞到我內急......後面個女仔叫我唔好等，問佢地拎鎖匙去廁所先。想不到返到嚟前面個幾個都真係未試完。

　　我會建議去搵蔡太，最好一係好早去，一係唔好咁早去。早去頭三位梗係即刻入，唔咁早去就係去到攞籌，四周行下食下嘢至返去等，至尷尬係其實早去，但又要企外面等，又唔係拎籌，都唔知走唔走開好。我就係一個咁不幸的人。

　　當然我覺得買GIRDLE又真係唔一定幫襯蔡太，因為上址似買矯形內衣的人較多(及耐)。如單是GIRDLE可以有其他選擇。

　　另外亦建議各位要有俾蔡太抽水同會俾唔同的女子「目視」個身體。我想貼個乳貼會好一些。當然我就無乜所謂，都係女人，但調返轉頭叫我目視人地個身體其實都幾唔好意思。

　　仲有，遲些蔡太會搬喇，好似搬去謝斐道樓上鋪。

　　之後又買了泡泡染髮。

　　自從大學之後都無染過髮，之前份工又唔俾染，我亦無偷染。到而家解放咗，梗係要扮靚啲啦！

　　而且下個星期影婚照了，要等啲頭髮有層次感才行。

　　我買的係曲奇啡。

　　都上到色，但我頭頂落得較重手，顯得個頭頂好淺兩側好深。

　　下次呢，我會選奶茶啡。

結婚證書套??

　　我未寫BLOG之前，我其實都無意識要買結婚證書套。我以為那是跟出世紙、會考證書差不多上下的文件。

　　見到很多JM很熱衷地DIY，或者幫襯某些手勢好替人弄證書套的買賣，我都在想要不要弄一個。

　　直至這個月返了新工，因為也要經常查核人家的結婚證書後，又給我一種新的感受。

　　這只是一份在法律上證明是夫妻關係的文件，是非常重要的。但我無法幻想，當有一天真的要用到它時，如果是把它從非常漂亮的證書套拿出來時，那位當時人見到照片見到證書會有多難過。(因為有可能是我吧??不過我不是太想囉。)

　　所以我現在只想找一個真正可以防潮的folder把它存起來。不敢說日後會不會改變心意，但我覺得我這樣做的成數十份高。

　　(我覺得這樣說JM們可會認為我是越來越沒趣了。)

我所不知道的事

　　今日終於頂唔住連把聲都變埋，於是唯有睇醫生。

　　醫生話我個款似病到後期好返的狀態，但唔知點解我好得咁慢，叫我去睇中醫喎！

　　都好，終於有番兩日病假加埋中秋節假期，到時應該好返哂啦！

　　下午瞓咗一陣，夜晚又去返學。本來我真係唔想返，但下星期就要做PRESENTATION約咗今日傾，我又覺得自己無理由咁衰唔返去。好在返咗學之後我精神都算OK，可以聽到書。

　　放學時原來波羅特登等我。咁我同佢傾咗一陣計（基本上我係半啞的）。我才知道我好像錯怪了未來老爺奶奶。原來他們都為到細仔要結婚的事情十分擔心，但他們阻止不了。或者說不知如何阻止。暫時我推測二人是為了買居屋才結婚吧？這樣的結婚根基真很危險。

　　我有建議波羅游說他細佬只搞註冊，其他的儀式或者擺酒都可以後搞，註冊只要家人到便成了。至少日後可以搞得好好睇睇之餘，他們亦趕得及現在買樓。而且可以多給時間兩人相處。即使日後兩人感情不穩，分開也無太多人需要交待。可是波羅說他是不能說服他弟的。他不能，他父母也不能。

　　若果只搞小型餐飲，恐怕波羅父母不是太滿意。搞大暫時又無錢。親戚要請嗎？朋友要請嗎？只能講句這位未來叔仔真很任性。

　　可是我目前暫時仍不是他大嫂，如果不能跟未來叔仔好好的談，其實應該和他的女朋友談一下。至少她是個怎麼樣的女孩與他們未來的計劃是怎樣。女孩該不是傻的，怎也會協調一下吧。否則日後兩老也會難受的。

　　唉，有甚麼不好說呢？都是一家人。