買了婚戒啦~!!

　　星期日終於訂了結婚戒指啦～！

　　其實買戒指這回事，我自己的要求是買兩個圈便可以啦，對於過多的鑽石的款式我並不太喜歡，因為最怕戴戴下會甩石，或者會遺失。如果簡單的款式的話會較容易補得回。既然要求是如此的簡單的話，那是走去一般的珠寶店看看也可以。

　　我和波羅曾經逛過一些珠寶店，只是原來對介的款式並不多，即使是多些也較難找到較合適的尺碼，當然最主要的原因是波羅「骨格精奇」了吧，適合我的戒指對他來說便是太幼身；適合他的對我來說便是過份粗身！所以決定要訂造了！

　　之前一直都屬意去百利的A-DIAMOND的，喜歡可以訂造，價錢看過還頗OK，不過去過好幾次都沒法進去：有兩次是剛好星期一，店關了門；一次是有人客在，我們沒有進去；一次是到了門口，但還差不夠半小時人家便關門，我們又沒有進去。就在剛過去的星期日，我們終於碰到好時間，遇到沒客人的店主夫婦！

　　店主夫婦十分熱情，不僅拿了絕大部份的戒指給我們看，還逐頁介紹前人造過的戒指款式。老闆娘非常厲害，是逐對戒指的介紹，一點倦容都沒有。只見有些新人的設計真的挺有心思。不過我們之前就沒有想過甚麼款式，波羅更加是有點眼花瞭亂。

　　我自己反而頗冷靜呢，把相類似的款式分類，歸納了三類波羅都屬意的款式：側面雕花、皇冠鑲石及直角刻字。側面雕花與皇冠鑲石分別只有一隻，但直角刻字類有五隻呢。於是叫他想清楚是不是想要前兩者。還好波羅說其實又不太喜歡前兩者，所以我們還是在直角刻字的那種方式裡選擇了。基本上這種款式還是我們在某大型珠寶店看過的那種，但是要在日本訂購，價值也不菲。

　　經過多番的考慮，我們還是集了各家的大成設計了我們的婚戒了，我最後還決定了要加鑽石，有點跟之前相違背呢，哈哈，幸好得波羅在金錢上全力支持呢！而最搞笑的當然是我與波羅的指圈大小了吧，我的指圈是「9」，但波羅卻是「28」，有夠差異多了吧！

　　戒指在一個月後就會有成品看了，很開心呢！

試衫down down down

　　婚紗這個item我是一直都沒有k.o.到的，一拖再拖之下，我就去book了溫馨。我book的原因係因為第一次上去的時候的感覺幾好。但那次我其實是非常累，但那兒的職員都很細心的介紹，所以後來再上去時就沒有再多想就下了訂。

　　在去溫馨試衫之前，我其實都沒有甚麼idea，只是想要有紗款，有點閃的。但真係好衰唔衰，就響試衫前一天去了希女試婚紗照的衫，突然令我對自己的dream gown有一定的看法（可能就是試過了很多款衫），原來真的同好多人一樣，會見到一件衫有「叮」的一聲的感覺！

　　於是我心裡鎖定了「紗」及「閃石／水晶」。我心想我就是循這個方法去揀衫。

　　可是去溫馨試衫實在是失望極了，係就係有極多的大拖尾款，但一不是上身不合心意、就是下身不夠漂亮(玩嘢呀!!件件得一半合心)，而最重要的原因是，真的沒有甚麼紗款的婚紗，我原以為都應該有兩三件可以揀，但那位sales給我看的是絹質的為主。所以試了都有十來廿件都找不到啱心意的。

　　後來我提到我第一次來的時候有一件全部拖尾都是花的有印象，於是那位sales就取了一件是波浪紋的紗款給我（花花的那一件在工場），不過那件是小拖尾的，大拖尾在工場處維修中（！）但讓我先看看款式。其實這件雖然未能令我有叮的感覺，但我覺得就較為近我心目中想要紗的條件了，加上波浪的層次非常多，事實上也是一件重手工的作品。於是試到這裡我便決定了這一件，因為試了個多小時也試到我累了，唯一始終不滿意就是上身不夠閃吧。

　　無錯是還有一次轉款，不過我也沒有多大信心可以再揀到更合心意的。如無意外應該會是這一件吧，不過我心裡想如果可以的話，我還是應該再在別處看看單租婚紗吧。仔細的想，現在溫馨的這件婚紗，用來行教堂及外影是非常不錯，可是晚上婚宴的話就不夠搶了，何況我還是在充滿舞台燈光的THE ONE煌府擺酒，不夠閃的婚紗就浪費了個場了。

　　問心我都不是要求很高，為甚麼只是兩個條件都咁難FULFILL？

希臘女神pre-wedding (試衫篇)

　　Join了希臘女神拍pre-wedding。我覺得自己都幾不智，本來是酒樓送的coupon，但一時間太快就join咗plan。照道理如果唔join plan，到之後才加相應該會抵d。不過join之時應該係joseph的相影得麻麻之後，我一時唔係幾開心之後做咗個咁的決定。

　　不過算啦，又有得影相，都係開開心心影。都有人話影咁多輯pre-wedding最靚係希女，咁我都即管試下係唔係，反正我都影咗兩三次相了。

　　今日就係希女安排的試衫日。原來今次希女有去婚展，所以成間鋪都靜嚶嚶......一坐低就俾相簿我地(我)揀衫啦！不過其實都係嗰三本，我都睇過好多次了。睇d衫就無乜特別，始終要試上身至知得唔得。

　　加上我之前無乜試衫經驗呢。今次影pre-wedding就試多幾個款，揀多d唔同色，睇下自己啱d乜。衫就係揀得多，不過試就真係唔係好多，都係試咗三份二。都唔知係真係無定無拎到出嚟。

　　首先都係試婚紗啦，由於唔影得相的關係，我都只能用口講了。婚紗有好多係D GRADE的都唔揀得，於是我就不是D GRADE的有靚靚地拖尾的婚紗。開頭試了幾件婚紗，自己心儀的就係一件好似女神的白色衫，而波羅有傾向一件有吊帶的款色。不過女神衫就不似婚紗又不像晚裝，而波羅鍾意嗰件我就FEEL到有少少舊舊地。但不知怎的，竟然在試最後一件婚紗時，竟然遇到極度合我心水的一件，好漂亮又新淨~！胸前又有很多閃石，拖尾是全紗，有些少喱士點綴，也有貼上閃石，好靚好靚，我覺得如果結婚當日穿上這一件都不錯呢～！也是因為這個原因，我現在對自己BIG DAY當日想穿甚麼都有了概括了。(呵呵！）所以婚紗這個選項總算在試最後一件時完成了。

　　至於晚裝方面，在試衫期間，我終於知道自己原來唔係好適合黃色、金色，紅、藍、綠就ok！但有得試的竟然又係金、黃色的多，我記得仲揀咗好多色，但都無得試，唉！好在最後在云云叫做剔選出來的晚裝中揀了一條紅色貼身晚裝，設計較為簡單，只在心口中間有很大顆的閃石胸針，略帶成熟；而另一條是粉藍色晚裝，是有點蓬的一種，上面有很多白色花花，屬於可愛型。總算揀出來兩件晚裝又算新淨又無撞款。不知拍照出來的效果如何呢？

　　不過我覺得今日serve我嗰位女仔服務認真麻麻，好鬼靜，又黑面，波羅話佢梗係見我揀咗好多件衫唔開心。其實我揀衫都預咗有好多佢俾唔到我試，所以我會揀多d，但我覺得個位女仔無同我正式講過有邊件衫出咗街、有邊件衫撞期、仲有邊件衫出咗婚展我無得試，甚至佢都無正式介紹過佢自己，我覺得搞到我唔係幾舒服。雖然我試衫次數算少(只係試過去JOSEPH同溫馨)，不過我覺得佢唔係幾PRO，試衫的手法略慢，例如佢每一次要收好之前件衫入袋至開件新的俾我試，我就成日要等佢；又如每試一件衫佢又唔會幫我捊好件衫，次次都要我由上面搵到個裙底。所以其實搞到試衫試得耐，我覺得都係佢手法問題。仲有佢對公司的衫都幾粗魯，拉拉鍊係突然間一嘢拉上去，咁搞法好容易拉爛條拉鍊；仲有響我試完衫後，嗰地下多咗好多珠片呀、閃石呀......咁，咁搞法D衫都幾唔耐著。

　　我諗好在我BIG DAY揀衫間公司D人係比較NICE，我覺得我份人都係BUY SERVICE多D。